पोखरा, २८ असोज । नेपाल सङ्गीत तथा नाट्य प्रज्ञा प्रतिष्ठानले कला, सङ्गीत, नाटक र संस्कृतिको प्रवर्द्धनका लागि नीतिगत सुधार र भावी योजना निर्माण गर्ने उद्देश्यले पोखरामा सुझाव सङ्कलन तथा अन्तरक्रिया कार्यक्रम आयोजना गरेको छ।
प्रतिष्ठानका प्राज्ञसभा सदस्यहरू विनोद बानियाँ, दीपक पराजुली र परिवर्तनको अगुवाइमा सम्पन्न उक्त कार्यक्रममा पोखरामा क्रियाशील विभिन्न सांस्कृतिक तथा साङ्गीतिक संस्थाका प्रतिनिधिहरूको सहभागिता रहेको थियो।
प्रज्ञा प्रतिष्ठानहरूले परिवर्तनको सङ्केत दिनुपर्ने
अन्तरक्रियामा सहभागी प्रतिनिधिहरूले प्रज्ञा प्रतिष्ठानहरूले आफ्ना नियमित गतिविधि र नीतिगत निर्णयमार्फत ठोस परिवर्तनको सङ्केत दिनुपर्नेमा जोड दिएका छन्।
कार्यक्रममा बोल्दै प्राज्ञसभा सदस्य तथा गायक विनोद बानियाँले विषयविज्ञहरूको सुझावका आधारमा आगामी प्राज्ञसभामा नीति निर्माणका लागि पहल गरिने बताए। “आवश्यकता र नीतिको सही संयोजन गरेर कार्यक्रम सञ्चालन गर्न सकिए मात्र गतिलो र दीर्घकालीन परिणाम हासिल हुन सक्छ,” उनले भने।
त्यसैगरी, प्राज्ञसभा सदस्य तथा र्यान्डम रिडर्स सोसाइटीका अध्यक्ष दीपक पराजुलीले प्राप्त सम्पूर्ण रचनात्मक सुझावहरूलाई प्राज्ञसभाको बैठकमा प्रस्तुत गरिने प्रतिबद्धता जनाए। पोखरा थिएटरका अध्यक्ष एवम् नाट्यकर्मी परिवर्तनले संस्थाको ध्यान नीति निर्माणको तहमा सकारात्मक दबाब दिनेमा केन्द्रित रहने बताए।
संयुक्त आयोजना र विद्यालय तहमा सङ्गीत-नाटकादी विषय
कार्यक्रममा गण्डकी प्रज्ञा प्रतिष्ठानका प्राज्ञसभा सदस्य तथा गीतकार प्रतिष्ठान नेपालका अध्यक्ष अनुराग अधिकारीले केन्द्रीय, प्रदेश (गण्डकी) र स्थानीय (पोखरा) प्रज्ञा प्रतिष्ठानको संयुक्त आयोजनामा विशेष प्रवर्द्धनात्मक कार्यक्रमहरू सञ्चालन गर्नुपर्ने आवश्यकता औँल्याए।
सो अवसरमा सहभागी अन्य वक्ताहरूले मुख्य गरी देहायका विषयहरूमा प्रतिष्ठानको ध्यानाकर्षण गराएका थिए:
- विद्यालय तहमा प्रवेश: सङ्गीत, नाटक र मौलिक संस्कृतिलाई विद्यालय तहका विद्यार्थीहरूसम्म पुर्याउने गरी लक्षित कार्यक्रम ल्याउनुपर्ने।
- प्रतिलिपि अधिकार र रोयल्टी: प्रतिलिपि अधिकार (Copyright) र रोयल्टीसम्बन्धी नीतिगत व्यवस्थालाई कडाइका साथ व्यावहारिक रूपमै कार्यान्वयनमा ल्याउनुपर्ने।
- समावेशी र सर्वस्वीकार्य कार्यक्रम: समाजका सबै वर्ग र समुदायले अपनत्व महसुस गर्न सक्ने प्रकृतिका सांस्कृतिक कार्यक्रमहरूको तर्जुमा गरिनुपर्ने।
बाक्लो सहभागिता
कार्यक्रममा हिमाली सांस्कृतिक परिवारका अध्यक्ष ज्ञानबहादुर थापा, गायक रामभक्त जोजिजू, पोखरा साङ्गीतिक कलाकार सङ्घका निवर्तमान अध्यक्ष सुनील थापा, उपाध्यक्ष तेज केसी, जोजिजू म्युजिक सेन्टरका प्रबन्धक विनित जोजिजू, पोखरा प्रज्ञा प्रतिष्ठानका परिषद् सदस्य दिलिप गायक, रेनेसा थिएटरकी रोशनी रामदाम र नाट्यकर्मी प्रमिला तुलाचनको उपस्थिति थियो।
त्यस्तै, गीतकार प्रतिष्ठानका संस्थापक अध्यक्ष हरिहर खनिया, उपाध्यक्ष लाल कार्की ‘अञ्जान’, सचिव रुपिन्द्र प्रभावी, पोखरेली युवा सांस्कृतिक परिवारका सचिव एमडी काफ्ले, त्रिवेणी सङ्गीतालयका सुनील बराललगायत कमला श्रेष्ठ, दलबहादुर गुरुङ, असीम शेरचन, डविन गुरुङ, निश्चल विमल, नेपालहरि रानाभाट र रामजी पौडेल लगायतका स्रष्टा तथा प्रज्ञाप्रेमीहरूको सहभागिता रहेको थियो।
सम्बन्धित क्षेत्रका सरोकारवालाहरूसँगै बसेर प्रत्यक्ष सुझाव सङ्कलन गर्ने प्रतिष्ठानको यस पहलप्रति सहभागीहरूले खुसी व्यक्त गर्दै धन्यवाद ज्ञापन गरेका थिए।
