रुसी आक्रमणबाट युक्रेनको २५ प्रतिशत इन्टरनेट पूर्वाधारमा क्षति

रुसी पक्षले डेटा सेन्टरमा भएको क्षतिका कारण इन्टरनेटसँग सम्बन्धित सेवामा अवरोध देखिएको जनाएको छ। रुसी पक्षका अनुसार आक्रमणपछि युक्रेनका केही क्षेत्रमा टेलिभिजन प्रसारणमा आंशिक अवरोध आएको छ। सामाजिक सञ्जाल तथा भिडियो सेवाहरूमा समेत समस्या देखिएको र किभका बासिन्दाले युट्युबसहित केही अन्य अनलाइन स्रोतमा पहुँच गर्न कठिनाइ भोगिरहेको दाबी गरिएको छ। किभस्थित कोस्मोनोभा डेटा सेन्टरले पनि शनिबार आफ्ना मुख्य पूर्वाधारमा क्षति पुगेको जनाएको छ।

कम्पनीले इन्टरनेट ट्राफिकलाई अन्य स्थानतर्फ मोड्ने तथा ब्याकअप स्थानबाट डेटा पुनःस्थापना गर्ने काम भइरहेको बताएको स्थानीय सञ्चारमाध्यमले जनाएका छन्। पछिल्ला केही सातादेखि युक्रेनका डेटा सेन्टर तथा दूरसञ्चार पूर्वाधारलाई लक्षित गरी आक्रमण बढेको रिपोर्टहरू सार्वजनिक भएका छन्। सेप्टेम्बर २३ मा मात्रै चारवटा डेटा सेन्टरमा आक्रमण भएको र त्यसबाट केही सञ्चार तथा डिजिटल सेवामा अवरोध आएको रिपोर्ट गरिएको छ।

रुसी रक्षा मन्त्रालयले कोस्मोनोभाका डेटा सेन्टरलाई लक्षित गरिएको पुष्टि गर्दै ती पूर्वाधारले मोबाइल इन्टरनेट सेवा तथा स्टारलिंकसम्बन्धी सहयोग उपलब्ध गराएको दाबी गरेको छ। यद्यपि, युक्रेनको सम्पूर्ण इन्टरनेट सेवा ठप्प हुने अवस्था भने नरहेको बताइएको छ। युक्रेनमा विभिन्न इन्टरनेट प्रदायक तथा वैकल्पिक सञ्चार मार्गहरू रहेकाले एउटा वा केही डेटा सेन्टरमा क्षति पुग्दा देशव्यापी रूपमा इन्टरनेट पूर्णरूपमा बन्द हुने सम्भावना कम रहेको विज्ञ तथा सेवा प्रदायकहरूले बताएका छन्।