काठमाडौं, २९ साउन । प्रतिनिधि सभाका सांसद तथा राष्ट्रिय स्वतन्त्र पार्टी (रास्वपा) का नेता डोलप्रसाद (डिपी) अर्यालले पर्यटन क्षेत्र मुलुकको अर्थतन्त्रको मेरुदण्ड भएको बताएका छन्। नेपाल एसोसिएसन अफ टुर एण्ड ट्राभल एजेन्ट्स (नाट्टा) को ५९ औँ वार्षिक साधारणसभाको उद्घाटन गर्दै उनले सो कुरा बताएका हुन्।
कार्यक्रममा बोल्दै उनले विदेशी मुद्रा आर्जनको प्रमुख स्रोतका रूपमा रहेको पर्यटन क्षेत्रको विकास र विस्तारका निम्ति सम्बद्ध सबै पक्ष एकजुट भएर लाग्नुपर्नेमा जोड दिए।
नीतिगत समस्या समाधान र व्यावसायिक सङ्गठनको भूमिका
कार्यक्रममा बोल्दै अर्यालले पर्यटन क्षेत्रमा रहेका नीतिगत तथा संरचनागत समस्याहरू समाधान गर्न सरकार गम्भीर हुनुपर्ने धारणा राखे। साथै, उनले नाट्टाजस्ता निजी क्षेत्रका व्यावसायिक सङ्गठनहरूले पर्यटन उद्योगको समग्र विकास र प्रवर्द्धनमा सक्दो योगदान पुर्याउनुपर्ने बताए।
नेपाल एयरलाइन्स र पर्यटन बोर्डलाई जिम्मेवार बन्न आग्रह
मुलुकको आर्थिक समृद्धिका लागि राष्ट्रिय ध्वजावाहक नेपाल वायुसेवा निगम (नेपाल एयरलाइन्स) र नेपाल पर्यटन बोर्ड (NTB) को भूमिका महत्त्वपूर्ण हुने उल्लेख गर्दै उनले यी संस्थाहरू इमान्दारीपूर्वक पर्यटन विकासमा लाग्नुपर्ने बताए।
पर्यटन क्षेत्रलाई प्रवर्द्धन गर्न सके मात्र देशमा वैदेशिक मुद्रा भित्र्याउन र आर्थिक गतिविधि चलायमान बनाउन सकिने उनको भनाइ थियो।
