काठमाडौं, २६ साउन। राजधानीको भृकुटीमण्डपस्थित प्रदर्शनी हलमा आजदेखि अटोमोबाइल क्षेत्रको बृहत् प्रदर्शनी ‘नाइमा नेपाल मोबिलिटी एक्स्पो’ औपचारिक रूपमा सुरु भएको छ।
एक्स्पोकै अवसर पारेर हिमालयन अर्गनाइजेसन अन्तर्गतको आधिकारिक विक्रेता आयाम इन्टरकन्टिनेन्टलले चीनको प्रसिद्ध ब्रान्ड डोङफेङ (DONGFENG) का ठूला विद्युतीय बसहरू नेपाली बजारमा सार्वजनिक गर्ने भएको छ।
नेपाल सरकारले ठूला विद्युतीय सवारी साधनलाई प्राथमिकता दिने नीति अंगीकार गरेको र बजारमा पनि ठूला ईभी बसको माग बढ्दै गएकाले डोङफेङका बसहरू भित्र्याइएको कम्पनीले जनाएको छ। यसअघि हिमालयन अर्गनाइजेसनले भारतको फोर्स मोटर्स र चीनको साइक (SAIC) ग्रुप अन्तर्गतको म्याक्सस ब्रान्डका सवारी साधनहरू सफलतापूर्वक बिक्री वितरण गर्दै आएको छ।
सार्वजनिक हुने बसका मुख्य विशेषता तथा योजना:
- प्रदर्शनमा रहने मोडल: एक्स्पोमा ७.२ मिटर लम्बाइ भएका २६ देखि ३० सिट क्षमताका बसहरू राखिनेछन्।
- भावी योजना: निकट भविष्यमै ९ र १२ मिटर लम्बाइका ३८ तथा ५२ सिट क्षमता भएका ठूला विद्युतीय बसहरू पनि नेपाल भित्र्याउने कम्पनीको तयारी छ।
- मूल्य र विशेष छुट: आधिकारिक मूल्य एक्स्पोस्थलमै घोषणा गरिने भए पनि बजारका अन्य प्रतिस्पर्धी ब्रान्डको तुलनामा निकै कम र आकर्षक मूल्य कायम गरिनेछ। साथै, एक्स्पो अवधिभर बुकिङ गर्ने ग्राहकका लागि विशेष छुटको व्यवस्था गरिएको छ।
- बिक्रीपछिको सेवा (After Sales Service): देशैभर रहेका हिमालयन अर्गनाइजेसनका नेटवर्क, शाखा तथा डिलरहरूमार्फत सहज स्पेयर पार्ट्स र गुणस्तरीय सर्भिसिङ सुविधा उपलब्ध गराइनेछ।
सन् १९६९ मा स्थापित चीन सरकारको स्वामित्वमा रहेको डोङफेङ अटोमोबाइल क्षेत्रको अग्रणी ब्रान्ड हो, जसका उत्पादनहरू विश्वका १०० भन्दा बढी देशहरूमा निर्यात हुँदै आएका छन्। नेपालमा पनि यस ब्रान्डका ट्रक, कार तथा माइक्रोबसहरू पहिलेदेखि नै लोकप्रिय रहँदै आएका छन्।
