काठमाडौं, २७ साउन। हिमालयन अर्गनाइजेशन अन्तर्गतको आयाम इन्टरकन्टिनेन्टलले चीनको बहुप्रतिष्ठित सवारी उत्पादक कम्पनी ‘डोङफेंग’ (Dongfeng) का विद्युतीय बसहरू नेपाली बजारमा सार्वजनिक गरेको छ।
भृकुटीमण्डपमा भदौ २६ गतेदेखि सुरु भएको ‘नाईमा अटो एक्स्पो’का अवसरमा कम्पनीले दुई नयाँ मोडलका बसहरू सार्वजनिक गरेको हो।
नेपाल सरकारले ठूला विद्युतीय सवारी साधनलाई प्राथमिकता दिने नीति लिएको र बजारमा पनि ठूला EV बसको माग बढेकाले कम्पनीले यी बसहरू नेपाल भित्र्याएको जनाएको छ। आयाम इन्टरकन्टिनेन्टलले यसअघि फोर्स मोटर्स र म्याक्सस ब्रान्डका सवारी साधन बिक्री गर्दै आएको छ।
सार्वजनिक मोडल, मूल्य र विशेष छुट
एक्स्पोमा ७.२ मिटर लम्बाइ भएका दुई मोडलका बसहरू प्रदर्शनमा राखिएका छन्:
- कम्फर्ट बस: २५+१ सिट क्षमता
- सिटी बस: २७+१ सिट क्षमता
यी बसहरूको सुरुआती मूल्य रु १ करोड १४ लाख ५० हजार कायम गरिएको छ। अटो एक्स्पोका क्रममा गाडी बुकिङ गर्ने पहिलो ५० जना ग्राहकलाई रु ५ लाख विशेष छुटको व्यवस्था गरिएको कम्पनीले जनाएको छ।
थप सुविधा र विशेषताहरू
ग्राहकको आवश्यकता अनुसार यी बसहरूमा निम्न सुविधाहरू थप गर्न सकिनेछ:
- वारेन्टी: ५ वर्ष वा २ लाख किलोमिटरसम्मको वारेन्टी उपलब्ध छ। ग्राहकले चाहेमा थप ३ वर्षको ‘एक्स्टेन्डेड वारेन्टी’ खरिद गर्न सक्नेछन्।
- एयर कन्डिसन र लक्जरी सिट: हाल सार्वजनिक गरिएका बसहरू बिना एयर कन्डिसन (AC) का भए पनि माग अनुसार थप शुल्कमा AC र लक्जरी सिट जडान गर्न सकिनेछ।
- प्रवेश द्वार (ढोका): बसमा एउटा वा दुईवटा प्रवेश द्वार नि:शुल्क जडान गर्न सकिनेछ। तर, दुईवटा ढोका राख्दा २ वटा सिट घट्नेछ।
भविष्यको योजना
कम्पनीले निकट भविष्यमै डोङफेंगका अन्य मोडलहरू पनि नेपाल ल्याउने तयारी गरेको छ। जसमा:
- ७.२ मिटरको स्कुल बस
- ९ मिटरको ३८ सिट क्षमताको बस
- १२ मिटरको ५२ सिट क्षमताको बस
यी बसहरूको मूल्य बजारमा हाल उपलब्ध अन्य ब्रान्डका बसहरूभन्दा निकै प्रतिस्पर्धी र कम हुने कम्पनीको दाबी छ।
बिक्रीपछिको सेवा (आफ्टर सेल्स सर्भिस)
डोङफेंग सन् १९६९ मा स्थापित चीन सरकारको स्वामित्वमा रहेको ठूलो अटोमोबाइल कम्पनी हो। हाल यसका उत्पादन १०० भन्दा बढी देशमा निर्यात हुँदै आएका छन्। नेपालमा बिक्रीपछिको सेवा तथा स्पेयर पार्ट्स हिमालय अर्गनाइजेसनका देशभर रहेका शाखा तथा डिलर नेटवर्कमार्फत सहज रूपमा उपलब्ध गराइने जानकारी दिइएको छ।
