भद्रपुर (झापा), २४ असोज । झापामा उत्पादित चियाको गुणस्तर सहजै परीक्षण गरी अन्तर्राष्ट्रिय बजारमा नेपाली चियाको पहिचान जोगाइराख्न जिल्लामै चिया परीक्षण प्रयोगशाला स्थापनाको पहल सुरु गरिएको छ।
जिल्ला प्रशासन कार्यालय झापाको पहल, राष्ट्रिय चिया तथा कफी विकास बोर्ड क्षेत्रीय कार्यालय झापाको आयोजना र खाद्य प्रविधि तथा गुण नियन्त्रण डिभिजन कार्यालय भद्रपुरको समन्वयमा शुक्रबार आयोजित चिया उद्योगी तथा सरोकारवालाबीचको अन्तरक्रियामा उक्त प्रयोगशाला स्थापनाका लागि सम्बन्धित निकायमा पहल गर्ने निर्णय गरिएको हो।
नेपालमा चिया उत्पादनको लामो इतिहास बोकेको झापामा प्रयोगशाला नहुँदा हाल काठमाडौँस्थित केन्द्रीय कार्यालयमै परीक्षणका लागि पठाउनुपर्ने बाध्यता छ। जिल्लामै प्रयोगशाला बनेमा गुणस्तर परीक्षण छिटोछरितो हुनुका साथै चियाको गुणस्तर सुधारमा ठूलो सहयोग पुग्ने सहभागीहरूले बताए।
खाद्य सुरक्षा र अखाद्य मिसावट नियन्त्रणमा जोड
कार्यक्रममा झापाका प्रमुख जिल्ला अधिकारी श्रवणकुमार पोखरेलले चियाको गुणस्तर कायम राख्नु उपभोक्ताको स्वास्थ्यसँग प्रत्यक्ष जोडिएको विषय भएको बताउनुभयो। “नेपाली चियाले अन्तर्राष्ट्रिय बजारमा बनाएको पहिचान जोगाउन उत्पादनदेखि प्याकेजिङ र बजारीकरणसम्म खाद्य सुरक्षा मापदण्डको पूर्ण पालना हुनुपर्छ,” उहाँले भन्नुभयो।
पोखरेलले तयारी चियामा अखाद्य र बाह्य पदार्थको मिसावट रोक्न उद्योगी, व्यवसायी र नियमनकारी निकायबीच निरन्तर समन्वय हुनुपर्नेमा जोड दिनुभयो।
अन्तरक्रियामा चियामा मापदण्डविपरीत रङ वा अन्य रसायन प्रयोग गरेमा हुने कानुनी दण्ड, जरिवाना र सजायका व्यवस्थाहरूबारे उद्योगीहरूलाई सचेत गराइएको थियो।
झापामा चिया उत्पादनको वर्तमान अवस्था
राष्ट्रिय चिया तथा कफी विकास बोर्ड, क्षेत्रीय कार्यालय झापाका प्रमुख इन्द्रप्रसाद अधिकारीका अनुसार जिल्लामा हाल ३८ वटा चिया उद्योग सञ्चालनमा छन्। झापाको १० हजार ५०० हेक्टर क्षेत्रफलमा चिया खेती भइरहेको छ, जसमध्ये तीन हजार ६०० हेक्टरमा करिब तीन हजार साना किसान संलग्न छन्। गत आर्थिक वर्षमा मात्र झापाबाट नौ करोड ८५ लाख किलो सिटिसी (CTC) चिया उत्पादन भएको थियो।
कार्यक्रमका सहभागीहरूले गुणस्तर सुधारका साथै किसानलाई समयमै रासायनिक मल उपलब्ध गराउनुपर्ने माग राखेका थिए। मल वितरण प्रणालीलाई प्रभावकारी बनाउन बोर्डले प्रदेश सरकारसँग आवश्यक समन्वय गर्नुपर्ने सुझाव समेत छलफलमा दिइएको छ।
