काठमाडौं, २८ साउन। नेपाल उद्योग वाणिज्य महासंघ (FNCCI) का अध्यक्ष अञ्जन श्रेष्ठले सरकारले आफैं उद्योग सञ्चालन गर्नुको सट्टा निजी क्षेत्रका लागि अनुकूल लगानी वातावरण, नीति र सहुलियत उपलब्ध गराउनुपर्नेमा जोड दिएका छन्।
मंगलबार ‘नाइमा मोबिलिटी एक्स्पो २०२६’ को उद्घाटन समारोहलाई सम्बोधन गर्दै अध्यक्ष श्रेष्ठले घाटामा रहेका सरकारी उद्योगहरूमा राज्यको रकम खन्याएर निजी क्षेत्रलाई खुला प्रतिस्पर्धा गर भन्नु व्यावहारिक र न्यायोचित नहुने बताए।
उद्योगीका प्रमुख चासो र मागहरू
- इकोसिस्टम र एसेम्बलिङ उद्योग: देशभित्रै सवारी साधन एसेम्बलिङ उद्योग स्थापना गर्न निजी क्षेत्र तयार रहेको उल्लेख गर्दै श्रेष्ठले त्यसका लागि सरकारले पूर्वाधार, नीतिगत स्थायित्व र उपयुक्त इकोसिस्टम तयार पार्नुपर्ने बताए।
- राजश्व उठाउने माध्यम मात्र नबनाउन आग्रह: अटोमोबाइल क्षेत्रलाई सरकारले अझै पनि राजश्व संकलनको दृष्टिकोणबाट मात्र हेर्ने गरेको गुनासो गर्दै उनले सवारी साधनलाई विलासिता नभई अत्यावश्यक साधनका रूपमा बुझ्न आग्रह गरे।
- पूर्वाधार र दुर्घटना न्यूनीकरण: २० वर्षको अवधिमा सवारी साधनको संख्यामा भारी वृद्धि भए पनि सडक पूर्वाधारको विस्तार कागजमै सीमित भएको उनले बताए। सडक दुर्घटना हुनुमा चालक वा सवारीको मात्र दोष नभई गुणस्तरीय सडक र पर्याप्त ट्राफिक जनशक्तिको अभाव पनि कारक रहेको उनको भनाइ थियो।
- नीतिगत अनिश्चितताको अन्त्य: सरकार परिवर्तनपिच्छे फेरिने नीतिहरूले व्यवसायमा अनिश्चितता ल्याउने भन्दै अटोमोबाइलसम्बन्धी निर्णय गर्दा व्यवसायीहरूसँग अनिवार्य परामर्श गर्नुपर्नेमा उनले जोड दिए।
नेपाललाई विदेशी वस्तु आयात गर्ने ‘डम्पिङ साइट’ बन्न नदिन स्वदेशी उद्योगहरूकै संरक्षण र प्रवर्द्धन गर्नुपर्ने बताउँदै अध्यक्ष श्रेष्ठले उत्पादन र रोजगारी सिर्जनाका लागि राज्यले अभिभावकीय भूमिका निर्वाह गर्नुपर्ने स्पष्ट पारे।
यो खबर पढेर तपाईलाई कस्तो महसुस भयो ?
+1
+1
+1
+1
+1
