पोखरा । मिस तामाङ्ग पोखरा २०२३ की प्रतियोगी नम्बर ९ विकिता तामाङ पोखरा बहुमुखी क्याम्पसबाट बीबीएस पूरा गरेकी छिन् । स्थायी ठेगाना खोटाङ भए पनि हाल उत्तमचोक, पोखरा बसोबास गर्दै आएकी छिन् ।
कंगारु एजुकेशन फाउण्डेशनमा डकुमेण्ट अफिसरको रूपमा काम गर्ने विकितालाई फुर्सदको समयमा संगीत सुन्न, पैदल यात्रा र प्रकृति फोटोग्राफीमा रुची छ ।
एक सफल उद्यमी बन्ने लक्ष्यका साथ जीवनको गोरटोमा अगाडी बढिरहेकी विकिताको जीवनमा प्रेरणा व्यक्ति आफ्नै आमालाई मान्छिन् ।
मिस तामाङ पोखरा २०२३ मा सहभागी भई संस्कृति, परम्परा र यसको इतिहास बारे जान्न उत्सुकताका साथ सहभागी उनी जीवन एक सुन्दर यात्रा हो, हरेक पलको आनन्द लिनुहोस् भन्ने सन्देश प्रवाह गर्न चाहन्छिन् ।
मिस तामाङ पोखराको ग्राण्ड फिनाले माघ १ गते हुने भएको छ । बैदाम तामाङ सेवा समाज पोखराको आयोजनामा हुने प्रतियोगिताको ग्राण्ड फिनाले पोखरा सभागृहमा आँउदो आइतबार हुने भएको समाजका अध्यक्ष ज्याक तामाङ्गले जानकारी दिनुभयो । २८५९ औ सोनाम ल्होसारको अवसरमा आयोजना गरिएको मिस तामाङ पोखराको फाइनलमा १६ सहभागीले प्रतिस्पर्धा गर्नेछन् ।
सातौं संस्करण प्रतियोगितामा लक्ष्मी तामाङ्ग, रेनुका तामाङ्ग, अर्विना तामाङ्ग, जुना तामाङ्ग, निशा तामाङ्ग, विकिता तामाङ्ग, सुप्रिया तामाङ्ग, योगिता तामाङ्ग, आकृति तामाङ्ग, विपना तामाङ्ग, मनिषा तामाङ्ग, जिना तामाङ्ग, सुमित्रा तामाङ्ग, कृतिका तामाङ्ग र रोश्मा तामाङ्ग प्रतियोगीका रुपमा सहभागी छन् ।
प्रतियोगिताको विजेताले नगद १ लाख रुपैयाँ पुरस्कार, ताज, ट्रफी, फस्ट रनरअपले नगद ५० हजार रुपैयाँ सहित ताज, ट्रफी, प्रमाणपत्र प्राप्त गर्नेछन । त्यस्तै सेकेण्ड रनरअपले नगद ३० हजार रुपैयाँ पुरस्कार, ताज, ट्रफी, प्रमाणपत्र हात पार्नेछन् । भ्युवर्स च्वाइसका रुपमा एकजनाले नगद २० हजारले पुरस्कार प्राप्त गर्ने कार्यक्रम संयोजक राम लामाले जानकारी दिए ।
कार्यक्रमबाट बचत रकम लेकसाइडमा समाजले निर्माण गरेको रिन्छिङ तोर्जेत तामाङ शान्ति गुम्बा सहयोगार्थ खर्च गरिने समाजका अध्यक्ष ज्याक तामाङले बताए । ग्राण्ड फिनालेमा कालो चश्मा गीतका चर्चित गायिका तथा कलाकार डोल्मा ह्याल्मोले गीत गाउने छन् । कार्यक्रम गण्डकी प्रदेशको मुख्य मन्त्री खगराज अधिकारीको प्रमुख आतिथ्यतामा हुने आयोजकले जनाएको छ । कलाकार तथा बरिष्ठ पाइलट विजय लामा कार्यक्रमको आकर्षण रहने छ ।
