चीनबाट ल्याइने नेपालीहरुलाई खरिपाटीस्थित विद्युत प्राधिकरणको तालिम केन्द्रमा राखिने

काठमाडौं २१ माघ

सरकारले चीनबाट फर्काइने नेपालीलाई भक्तपुरको खरिपाटीस्थित नेपाल विद्युत प्राधिकरणको तालिम केन्द्रमा राख्‍ने तयारी गरेको छ ।मंगलबार साँझ प्रधानमन्त्री तथा मन्त्रिपरिषदको कार्यालय सिंहदरबारमा मुख्यसचिव लोकदर्शन रेग्मीको अध्यक्षतामा बसेको बैठकले चीनबाट ल्याइने नेपाली नागरिकलाई भक्तपुरस्थित विद्युत प्राधिकरणको तालिम केन्द्रमा राख्ने तयारी गरेको स्रोतले बताएका छ ।

स्रोतका अनुसार तालिम केन्द्रको पूर्वाधार र अन्य वस्तुस्थितिबारे निरीक्षण गरेर मात्र त्यहाँ राख्ने विषयमा अन्तिम टुंगो लगाइने छ । तालिम केन्द्रको स्थितिबारे स्वास्थ्य मन्त्रालयका अधिकारीले निरीक्षण गर्नेछन् ।बैठकमा मुख्यसचिव रेग्मी, प्रधानसेनापति पूर्णचन्द्र थापा, प्रहरी महानिरीक्षक सर्वेन्द्र खनाल, सशस्त्र प्रहरी महानिरीक्षक शैलेन्द्र खनाललगायत सहभागी भएका थिए ।

कोरोना भाइरसको संक्रमण फैलिएपछि चीनको वुहानमा रहेका नेपालीहरुलाई स्वदेश फर्काइने सरकारले तयारी गरे पनि राख्ने ठाउँको टुंगो लगाउन सकेको थिएन ।सरकारले चीनबाट फर्काइएका नेपालीलाई राख्ने ठाउँको टुंगो लाग्ने वित्तिकै उनीहरुलाई स्वदेश फर्काइने यसअघि नै जानकारी दिइसकेको छ ।

स्वास्थ्य मन्त्रालयका प्रवक्ता महेन्द्रप्रसाद श्रेष्ठका अनुसार सरकारले नेपाली नागरिकालाई चीनबाट स्वदेश फर्काउनका लागि दुई वटा जहाज पनि तयारी अवस्थामा राखेको छ ।उनका अनुसार चीनबाट नेपाल फर्किनका लागि १ सय ८० जनाले फारम समेत भरिसकेका छन् । चीनबाट नेपाल ल्याइएपछि उनीहरुलाई विमानस्थलमा स्वास्थ्य परीक्षण गरिनेछ । उनीहरुलाई १४ दिन क्वारेन्टाइनमा राखिनेछ।

हालसम्म कोरोना भाइरसको संक्रमणबाट ज्यान गुमाउनेको संख्या ४ सय २६ पुगेको छ । मंगलबार हङकङमा पनि एक जना बिरामीको मृत्यु भएपछि चीनबाहिर मृत्यु हुनेको संख्या २ पुगेको छ । यस अघि फिलिपिन्समा पनि एक जनाको मृत्यु भएको थियो। खबरहब

Facebook Comments