अनलाइनबाट श्रम स्वीकृति लिन यस्ता कागजात पेश गर्नुपर्ने

काठमाडौं ११ पुस । वैदेशिक रोजगारीमा जाने श्रमिकका हकमा अनलाइनमार्फत श्रम स्वीकृतिका लागि म्यानपावर कम्पनीले मागपत्र, करारपत्र लगायतका कागजी प्रक्रिया पेश गर्नुपर्ने भएको छ ।

विदेशस्थित नियोगले प्रमाणीकरण गरेका मागपत्र अबदेखि विभागको अनलाइन प्रणाली सिधै आउने गर्छ । नियोगबाट प्रमाणिकरण भएर आएको कागज विभागको अनलाइन प्रणालीमा आउँछ । यसरी फाइल विभागको अनलाइनमा आएपछि वैदेशिक रोजगार विभागले डिमाण्डको पूर्व स्वीकृति गर्छ ।

अनलाइन प्रणाली लागू भएपछि व्यवसायीहरुलाई आफ्नै इमेलमा पूर्व तथा अन्तिम श्रम स्वीकृतिका बारेमा विभागले जानकारी गराइदिन्छ । त्यसपछि उनीहरुले श्रमिकसँग अन्तर्वार्ता र अन्य प्रक्रियाका अघि बढाउन पाँउछन् ।

अब पहिलो जस्तो म्यानपावर कम्पनीले राखेका श्रम प्रतिनिधि विभागको काठमाडौं कार्यालय ताहाचल जानु नपर्ने विभागले जनाएको छ । दूतावासबाट सूचना प्रणालीमा प्रमाणीकरण भएर आएका मागपत्र विगतमा नक्कली हुने सम्भावना समाप्त भएको विभागको दाबी छ ।विचौलियाको चलखेल बन्द हुने, श्रम स्वीकृतिको डकुमेन्ट अनलाइनमा नै भेरिफिकेसन गर्न सकिने, म्यानपावरको कुरियर खर्च समेत बचत हुने विभागले जनाएको छ ।

विदेश जानेहरुले अनिवार्य गर्नुपर्ने बीमा बापतको रकम पनि अबदेखि अनलाइन मार्फत नै भुक्तानी गर्न सकिनेछ । अहिलेसम्म बीमा बापतको प्रिमियम रकम अनलाइनमा भुक्तानी गर्ने व्यवस्था थिएन ।वैदेशिक रोजगार सम्बन्धी बीमालेख जारी गर्दा र नवीकरण गर्दा अनलाइन प्रणालीबाट गर्न बीमा समितिले ४ वटा बीमा कम्पनीलाई निर्देशन दिएको छ ।

Facebook Comments